កណ្តាល៖ ក្រោយសមត្ថកិច្ចបានទទួលដំណឹងពីប្រជាពលរដ្ឋដែលបង្ហោះនៅតាមសង្គមហ្វេសប៊ុកជុំវិញក្មេងទំនើងបង្កអសន្តិសុខដោយយកដុំថ្មគប់លើរថយន្តដែលធ្វើដំណើរនៅតាមផ្លូវជាតិលេខ១ ស្ថិតក្នុងស្រុកកៀនស្វាយ ខេត្តកណ្តាល សមត្ថកិច្ចបានស្រាវជ្រាវ និងឃាត់ខ្លួនក្មេងទំនើងសរុបចំនួន ៨នាក់។
ក្មេងទំនើងទាំងនោះបានដុំថ្មគប់រថយន្តធ្វើឱ្យខូតខាត នៅថ្ងៃទី០៤ ខែមីនា ឆ្នាំ២០២៣ ស្ថិតនៅភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល។ នៅថ្ងៃទី០៦ ខែមីនា សមត្ថកិច្ចបានឃាត់ខ្លួនក្មេងទំនើងចំនួន ៣នាក់ ដោយពួកគេបានសារភាពថាពួកគេពិតជាមានចេតនាគប់រថយន្តម៉ាកកូរ៉េ ១គ្រឿងបណ្តាលឱ្យបែកកញ្ចក់ផ្នែកខាងមុខ រួចក៏ជិះម៉ូតូគេចខ្លួន ហើយជនសង្ស័យក៏បានប្រាប់ថាពួកគេនៅមានបក្សពួកជាច្រើននាក់ទៀត ហើយពួកគេក៏ធ្លាប់បានប្រើប្រាស់គ្រឿងញៀនផងដែរ។
តែយ៉ាងណាមិញជនរងគ្រោះម្ចាស់រថយន្តមិនបានដាក់ពាក្យបណ្តឹងឡើយ។ ប៉ុន្តែសមត្ថកិច្ចនៅតែបន្តស្រាវជ្រាវ និងបានឃាត់ខ្លួនជនសង្ស័យទាំង៥នាក់បន្ថែមទៀត ក្រោមការបញ្ជាដឹកនាំដោយស្នងការនៃស្នងការដ្ឋាននគរបាលខេត្តកណ្តាល លោកឧត្តមសេនីយ៍ទោ ឈឿន សុចិត្ត។ បច្ចុប្បន្នកម្លាំងជំនាញកំពុងសាកសួរ និងកសាងសំណុំរឿងចាត់ការតាមនីតិវិធី៕
